Tintelende Troetelsondes

Ek geniet die boeke van Oom Desnieteenstaande
Desondanks omdat sy oortuigings so duidelik uit
sy woorde skyn, omdat hy skryf met ‘n vonkel in
die oog en somtyds sprankelende hoogtes bereik

Sy inspirerende boodskappe dra slegs betekenis vir
dié wat reeds glo, vir my wat die boek nou al veertien
jaar bestudeer, is daar persoonlike notas en aan-
tekeninge oor gebedsverhoring in my handskrif

wat die boek ongelooflik kosbaar maak; ek geniet
dit om met Oom Desnieteenstaande te korswel en
sommer net dwars te wees, te lag oor woorde soos
parakleet, eerste keer in die tent gelees toe ons

in Cape Vidal uitgekamp het, die boek bevat soveel
vertroosting elke keer as iets verkeerd gegaan het;
ek was stomgeslaan toe my ma hom as niksseggend
afgekraak het – sy is ‘n Ferdinand-Deist-persoon

Maar Oom Tintelende Vreugde wat graag troetelsondes
uitwys sodat ek goed weet waar om vreugdevolle onheil
op te soek, raak my hart direk; waar Deist ‘n intellektuele
oefening bied – daar is plek vir albei in my lewe…